政情：Eva收編高達滅噪音

立法規管一手住宅物業銷售督導委員會尋日正式開鑼，會後向記者匯報委員會未來工作路線圖同時間表嘅，唔係任主席嘅運輸及房屋局常秘柏志高，而係白鴿黨立法會議員「高達」李永達。

一手樓不良銷售手法近年最為人詬病，運輸及房屋局局長Eva鄭汝樺早前委任高達入督導委員會，當時已經有指政府又玩政治收編，一嚟塑造吸納異見嘅良好形象，二嚟多個自己友等如少個敵人。高達過往喺一手樓問題上鬧得最狠，Eva出手收編，變相封咗高達半個口，反對噪音少好多。最現成嘅例子，高達尋日向記者講解委員會日後職權同工作進程，做得「發言人」嚟，仲邊有時間同閒情向委員會挑骨頭同發炮批評呢？

其實，政府收編政治對手，近年已成為建制派殲滅反對聲音嘅慣技。尋日問過高達，佢死撐話唔覺得被收編，當局搵佢入督導委員會，全因佢過往喺一手樓銷售手法問題鬧得夠勁，佢尋日喺會上已表明心志，政府做得啱就支持，唔啱就反對，冇情講。