政情：活化舊警察宿舍 陳智思預做箭靶

做公職難，做公職王更難！中環荷李活道前已婚警察宿舍活化計劃爭奪戰塵埃落定，負責主宰評審大權嘅歷史建築諮詢委員會主席Bernard陳智思出嚟開記者會，交代遴選過程細節。外界關注警察宿舍活化項目前景之餘，亦擔定櫈仔等睇好戲，記得上年初北九龍裁判法院活化項目爭奪戰一役，當時八和會館投摽落選，激發八和主席汪明荃同Bernard隔空過招，唔知歷史會唔會重演呢？

或重演北九裁判法院事件

警察宿舍活化項目有四個單位競逐，撇除跑出嘅同心教育文化慈善基金，其他係信和旗下非牟利機構、黃英琦同胡恩威領軍嘅香港當代文化中心同一個內地基金。Bernard怕唔怕今次會重演北九事件先？

Bernard擺出一副「出得嚟行，預咗要還」嘅態度，話做好晒心理準備，預咗今次可能又會畀人射到成身箭，冇計啦，每次活化項目招標，總有人中標、有人唔中標，落選又總係覺得評選唔公平，有人不滿好正常，冇人鬧佢至出奇啦。咁講法，Bernard即係預咗一身箭啦！難為佢咁有阿Q精神。

不過，政治風波唔係你用精神勝利法就可以化解，Bernard除咗擔任歷史建築諮詢委員會主席，亦係近年經常捲入政治漩渦中心嘅古物諮詢委員會主席，下一個計時炸彈已由「保育女戰士」何來為佢埋下。

何來去信保天星巴士總站

政府已獲立法會撥款，喺尖沙咀天星碼頭對出位置興建大型廣場，現址巴士總站勢將拆卸。何來已去信古物古蹟辦事處，申請將巴士總站列為「歷史城市地景」，如果獲古蹟處處理，個波最終又係交畀Bernard，喺古諮會定奪。

當年拆皇后碼頭同鐘樓，激起滔天巨浪，政府中箭投降，Bernard話唔知何來嘅申請去到邊個階段，但唔識政治嘅人都諗到，保育係當今最棘手嘅課題，若然古諮會要接手處理，肯定係燙手山芋，滿足唔到何來嘅要求，固然會招嚟何來同保育人士批評，但就算滿足到何來，一樣有可能惹嚟社會其他人士非議，真係點做都死！