政情：建仔質詢幫郭晶晶出頭？

有建仔嘅立法會議員將喺十一月二十四號嘅立法會大會上，提出一個口頭質詢，內容係關於早排引起軒然大波嘅紅外線攝錄機，事關早前有人將跳水公主郭晶晶嘅疑似露點相放上網，據講呢啲相係用紅外線攝錄機拍攝，搞到着住泳衣嘅晶晶無辜露點。

呢條口頭質詢嘅內容主要係質疑政府對呢類紅外線攝錄產品冇監管，要求政府切實考慮立法打擊呢種行為，同埋檢討依家監察互聯網上侵犯他人私隱嘅措施係唔係足夠。

大家都知道，郭晶晶同另一位立法會議員霍震霆個仔霍啟剛拍緊拖，據聞兩個仲已經發展到談婚論嫁嘅階段，唔通今次建仔嘅議員係代霍公子個未來新抱出頭？

建仔嘅議員猛話唔關事，提出呢條質詢係因為建仔研究部都覺得呢個問題好嚴重，加上佢又係黨內負責處理個人私隱問題嘅代表，所以先會提出呢條問題，仲話佢提呢條質詢時冇同霍公子傾過，所以講唔上係代對方出頭喎！