政情：林健鋒暗摑唐唐亂噏

喺關愛基金督導委員會二十名非官方成員當中，只得三名商界代表，畀人批評有違政府商界合作齊齊關愛社會嘅原意，而擔任委員會主席嘅唐唐前日喺記者會上，搵香港總商會主席胡定旭做擋箭牌，話肥胡乃代表總商會入委員會，已經代表好多商界。事後隨即有人爆料，話總商會理事會對關愛基金有唔同意見，肥胡冇可能代表總商會入委員會，暗批肥胡亂用總商會招牌，甚至有違理事會決定。

我哋尋日同都係督導委員會成員、總商會喺立法會嘅代表林健鋒（Jeffrey）傾開呢件事，佢就反轟爆料者亂噏，指雖然督導委員會入面好多委員嚟自唔同團體或政黨嘅成員以至領導，但全部以個人身份接受任命。佢又話，如果肥胡代表總商會入去，連埋佢在內豈不是同時有兩個總商會代表？做過工總主席嘅唐唐，點會唔識避免得失本港其他幾個主要商會呢？Jeffrey估計政府揀中肥胡，係因為佢身兼醫管局主席又係資深會計師，將來審批一啲同醫療有關嘅資助項目以至制訂基金投資策略，都可以畀到意見。咦！咁咪即係變相摑咗唐唐一巴？

至於話總商會理事會唔撐關愛基金一說，據悉理事會只係對應否以商會名義向基金捐款，呼籲旗下會員提意見，唔係否定整個基金嘅成立同概念。