政情：搞搞政：德成局長縮骨一味潛水

為咗申辦二○二三年亞運會，政府一擲百幾億都在所不計，點知撞板撞到焦頭爛額，惟有死死氣整個「劈價」到六十億嘅縮水方案出嚟。尋日民政事務局上立法會解畫，但唔見局長曾德成身影，只有常秘楊立門出嚟畀議員圍插。德成局長咪以為玩潛水就甩到身，其實好多魚雷喺後面追住佢！

立法會民政事務委員會尋日晨咁早開會，大部分議員都鬧爆呢個縮水申亞方案，眼利嘅白鴿黨立法會議員張文光質問點解德成局長唔蒲頭？係咪代表政府打定輸數？楊立門苦笑話，尋日係廣州亞運開幕，所以德成局長要去廣州，仲話佢開完會都要北上。

張文再追問點解德成局長又唔開埋會先上去呢？去到呢個地步，楊立門都只能以有啲工作要德成局長先做到嚟蒙混過關，張文亦冇追問，似乎唔想令楊立門難堪。

德成局長都唔係第一次匿埋唔見人，遠嘅唔講，就講禮拜二政府宣布呢個縮水方案，德成局長都只係出新聞稿了事，其實當日佢仲去咗香港體育學院參觀，參觀完仲就住體育發展同記者侃侃而談，偏偏有必要要佢講嘅又唔現身，平時就成日去埋啲開幕禮、嘉許儀式等，認真縮骨。