政情：黃志祥夫婦掃三千蚊生果

前日傍晚六點半路過跑馬地成和道，離遠見到信和置業主席黃志祥企咗喺平治房車座駕旁邊，眼定定望住一間生果舖，心諗唔通佢睇中個舖位？

我哋行過去生果舖睇吓，原來黃太喺舖頭入面揀緊生果，所以黃志祥喺門外等候，相信係睇吓老婆使唔使幫手。當時黃太已買到尾聲，正喺手袋銀包中攞出一疊銀紙找數。黃太數錢期間，生果舖負責人就幫手搬咗幾箱生果出去車尾箱，其中兩箱係澳洲同泰國大杧果，另外仲有多款靚生果，另一名店員就負責收錢，據講黃太一共買咗三千幾蚊。

據聞黃志祥夫婦係呢間生果舖嘅熟客，每次入貨都指明要買最靚嘅生果，最鍾意食頂級榴槤同泰國大杧果，買親都幾千蚊。黃志祥喺新加坡出生，父親為新加坡地產大亨黃廷方，鍾意食榴槤同杧果呢啲東南亞生果一啲都唔出奇。

之不過，我哋打聽到黃志祥夫婦前日其實係買咗兩份生果，據聞係準備攞去探望兒子黃永光夫婦同孫仔黃家寶。家寶呢個月底就一歲生日，莫非做爺爺嘅黃志祥打算拎埋啲生果去同乖孫慶祝生日？

目送黃志祥夫婦座駕離去後，生果舖隔籬間麵店負責人行出嚟打牙骹，透露黃志祥夫婦好鍾意食佢哋啲魚蛋，仲話買生果前幫襯佢哋買咗兩斤魚蛋同魚片，盛惠百幾蚊。咁都攝到位宣傳，真係識做生意。