政情：泛民飯盒會助理惡撈

泛民主派立法會議員尋日開例行「飯盒會」，特別之處係今次乃社民連上禮拜宣布退出之後嘅首次，唔知冇咗社民連之後，飯盒會嘅運作會唔會比之前更暢順呢？據講，其實冇乜分別，一直以嚟多多爭拗嘅都只係社民連三子，但自從五區總辭後，三子已經冇出席，所以依家分別唔大。

自從五區總辭之後，代表社民連出席飯盒會嘅已經變成副主席吳文遠等第二梯隊。有泛民議員仲話，呢批人平時大部分時間都係以事論事，所以大家一直都相安無事。不過，飯盒會召集人就透露，原來泛民離離合合其實影響到飯盒會嘅助理。

飯盒會助理嘅人工係由咁多位泛民議員夾錢出，但近大半年呢位助理嘅合約已經轉咗四次，除咗五區總辭之外，總辭議員重返立法會、鄭家富退出白鴿黨，連埋今次社民連退出飯盒會，夾埋總共四次。召集人話每一次更改合約，相隔唔夠六十日，其實泛民可以唔幫助理供強積金，但佢哋當然唔會做無良僱主啦！