政情：扶貧不力議員爭住插

政府扶貧乏力，煲呔曾喺早前嘅施政報告仲㩒住荷包，唔肯增加政府嘅經常性開支，反而揼大孖沙心口，夾份成立百億元關愛基金。政府尋日公布基金嘅督導委員會名單，但基金嘅運作方向未明，錢點樣到位都講唔出，市民又點會對政府有信心？

基層市民跌出安全網

扶貧點可以歎慢板，所以富貴黨主席Miriam劉健儀就喺下禮拜三立法會大會提出動議辯論，要求政府檢討安全網保障範疇。Miriam開宗明義話，鑑於政府歷年均採取保守嘅財政政策，過往經常錄得超出預期嘅盈餘，加上外匯基金喺今年第三季大賺逾七百億元，而本年嘅土地拍賣收益可觀，庫房繼續水浸嘅機會大增，但部分基層市民不僅無法享受經濟發展帶嚟嘅成果，更未能受惠於社會保障制度，以致出現「漏網」情況，要求政府補網同適度擴展安全網咁話。

Miriam擺明係鬧政府扶貧不力，仲要求政府放水幫基層同困難戶。呢個動議可謂一石激起千層浪，竟然引嚟立會內建制派同泛民主派，包括建仔、民協、白鴿黨、公文袋、社民連、工聯會、職工盟同五散人等都蜂擁提出修訂，竟然破紀錄出現十個修訂。

老實講，呢啲修訂嘅內容都耳熟能詳，大多都係佢哋以住提出嘅扶貧建議，例如民協馮檢基提出重設扶貧委員會；工聯會葉偉明同五散人嘅陳健波都提出要政府設立全民退休保障；建仔嘅譚耀宗就要求政府協助少數族裔人士就業同解決生活困難及開設多啲適合青少年嘅職位；泛民主派多名議員分別提出將醫療券金額提高至一千蚊、幫助板間房嘅低收入人士，同埋設立失業救濟金等。

致深層次矛盾損和諧

議員提出嘅建議唔係今日先爆出嚟，而係講咗好多年但政府都唔肯做嘅嘢，所以至會出現破紀錄「一拖十」，即原動議加十個修訂動議嘅情況，擺明到時佢哋會齊齊「打小人」，鬧爆政府呢個造成「深層次矛盾」同搞到社會唔和諧嘅元兇！