院方懶懶閒 家屬不滿

【本報訊】張志強患病後飽受三個月疼痛折磨，大女兒昨日談及父親病情時，不滿地說：「爸爸平日好抵得痛，但八月到依家，肚痛冇停止過，不斷食止痛藥，但爸爸話啲止痛藥根本冇用，食完都仲痛，兩間醫院嘅醫生都話個病好怪，係咁痛㗎嘞，叫佢習慣吓痛楚，佢哋根本冇重視過病情，一啲都唔着緊！」病人家屬質疑院方懶懶閒，期間更試圖叫病情嚴重的父親出院，發現小腸壞死後，更對父親病情採放棄態度。

未切壞死小腸

張小姐的父親八月十八日病發多次進出北區醫院及伊利沙伯醫院，至今近三個月，兩院醫生都對病人持續肚痛肚脹束手無策，只是頭痛醫頭，腳痛醫腳，對病因毫無頭緒，致令病情一拖再拖，延誤三個月救治時間。

本周一醫生為張父進行電腦掃描，發現小腸壞死後，醫生向其家人指要緊急做手術，但指手術風險大，擔心病人身體太弱捱不住，「醫生都唔知手術成功率幾多，淨係話唔知肚入面乜嘢情況。」

張氏一家滿以為手術後會無事，豈料術後醫生宣布「冇得救」的壞消息，家人批評醫生在手術時沒有將壞死的小腸切除，儼如判病人死刑，「醫生淨係話條腸壞晒，冇得切，淨係清除咗腹膜嘅污糟嘢，再縫番埋個肚就算，醫生都講到明話依家冇乜嘢可以做，只係用嗎啡止痛，我哋真係對北區醫院好失望。」