政情：孫穗芳為爺爺銅像開光
政情：孫穗芳為爺爺銅像開光
拖咗兩年，中文大學豎立孫中山銅像終於守得雲開，銅像尋日正式由儲物室搬到逸夫書院校友徑側草地豎立，並舉行揭幕儀式。孫中山嘅孫女、孫逸仙和平教育基金會主席孫穗芳同兒子王祖耀一齊見證揭幕，喺儀式開始前，信奉佛教嘅孫穗芳一個人行到銅像前唸唸有詞，然後喺袋中取出碌柚葉向銅像灑水開光，希望中大有正氣。
孫中山銅像「被困」兩年，孫穗芳好大量冇計較，話對銅像成功喺中大豎立感到高興，又話銅像同將來命名嘅逸仙樓學生宿舍遙遙相對，實在相得益彰。
中大校長沈祖堯致詞時就為銅像風波補鑊美言一番，希望中大同學會受到孫中山嘅精神感染，向「天下為公」目標邁進，並為國家富強同民主作出貢獻。
講到民主，問到民主女神像幾時先至可以喺中大豎立，沈祖堯只係簡簡單單用兩句交代，話依家同學生傾緊，希望盡快搞掂喎！
孫穗芳（右二）、王祖耀（左一）同沈祖堯（右一）等，為豎立喺中文大學嘅孫中山銅像揭幕。