政情：搞搞政：發叔玩潛水謀定而後動

新界鄉議局主席兼行政會議成員同立法會議員嘅劉皇發，考慮放棄競逐連任龍鼓灘村代表同屯門鄉事委員會主席，消息尋日傳出後，整個鄉事派大為震驚。有意挑戰發叔競逐屯門鄉委會主席嘅福亨村代表曾展雄話，尋日睇到本報報道後先知發叔唔選，事前完全未有聽聞，但佢認為發叔要親身企出嚟承認至可作實。

尋日立法會開每周例會，由朝到晚都唔多見發叔。有議員話喺前廳休息室見過發叔，但好快又唔見咗人。點解要快閃？睇嚟發叔都係採用之前處理漏報買樓風波嘅手法，暫時唔回應任何問題，免生枝節，又可能係想靜觀其變，謀定而後動都未定，總之係想睇定啲局勢先算啦！

有接近發叔身邊嘅人透露，發叔唔選係意料中事，因為發叔咁多年都習慣自動當選，佢老人家點會參選同人爭吖！呢位身邊人又話，發叔曾經講過，自己年紀已有番咁上下，無謂咁辛苦做咁多嘢囉，不如集中精神做好鄉議局主席嘅工作。何止鄉議局？佢仲身兼行政會議成員同立法會議員喎！