政情：田少有份點醒陳裕光

早前大家樂剋扣員工飯鐘錢事件激起全城圍攻，集團主席陳裕光最終撤回扣飯鐘錢政策，平息風波。

富貴黨前主席田北俊尋日證實曾扮演說客角色。話說佢上禮拜五晚打電話畀陳裕光，無錯係為咗飯鐘風波，但原意絕非做和事老，而係代富貴黨主席劉健儀做信差，向陳傳達一個口信，澄清胞弟田北辰罷食大家樂唔代表黨立場，因陳裕光係旅發局成員，所以呢份差事由旅發局主席田少嚟做，順便問吓大家樂打算點收科。

田少講完諗住收線，點知陳裕光主動話事件形勢複雜，反過嚟問田少有乜建議，田少即刻打蛇隨棍上，指大家樂每年用成千萬元賣廣告都係想建立良好形象，但一宗飯鐘風波令形象受損，賣幾多廣告都補唔番，條數應該好易計啫。結果喺第二日，大家樂就宣布撤銷扣飯鐘嘅政策。

田少話：「我同佢講，從營商角度講，生意做到咁大唔容易，你都要顧慮到商譽。」田少仲再三強調唔敢邀功，相信佢只係眾多游說陳裕光嘅商界朋友中之一位，但點都好，見到飯鐘風波以呢個結局完場，佢都好開心。

田少尋日都幫陳裕光講番兩句好話，指最低時薪二十八蚊實施後，如果大家樂生意額下跌，因而加價，亦希望市民多多體諒，事關大家樂係上市公司，一旦發盈警，其股價同銀行貸款都難免受衝擊。