政情：鄭明明探路赴韓拉面皮
政情：鄭明明探路赴韓拉面皮
一連三日嘅亞太區美容展尋日揭幕，有「美容教主」之稱嘅鄭明明以自家品牌「FAIRLADY」參展，拉埋前港姐冠軍謝寧同粉絲交流美容心得。原來謝寧二十一歲已搵明明姐紋眼線，難怪兩人咁啱傾。
明明姐年前受濕疹困擾，扮靚都冇心機，休息一年後好番晒。最近香港熱吹「韓風」，去韓國整容風氣日盛，明明姐亦正計劃去韓國拉面皮。佢話早已探路，知道韓國醫生手勢唔錯，心思思想將略嫌下垂嘅法令紋向上提升。佢自爆一直有打Botox，但講到動手術就係第一次。係人整容都唔想畀人知，佢就話唔介意事先張揚，因為整容無罪喎。
不過講到年齡呢一個秘密，明明姐就保持神秘，笑言年年都係二十五歲。呢個月尾係佢牛一之喜，將喺上海舉行盛大生日派對，仲請埋「中國女電王」李小琳等逾百位好友一齊吹蠟燭。
鄭明明（中）參加亞太區美容展，好友謝寧（左）同大女陳維蕊（右）齊撐場。