政情：德成局長捉蟲劈價申亞趕客

政府申辦亞運會面臨觸礁危機，竟然學夜冷舖搞劈價救亡，將申亞經費預算大削六成至唔超過六十億元，以為可以博取立法會政黨同社會回心轉意支持撥款，點知又係捉蟲之舉，民政事務局局長曾德成點做推銷員㗎？本來要炒起申亞個勢，依家竟然愈炒愈燶！

仲記得德成局長早前公布逾四億元嘅申亞諮詢文件時，講到香港有能力應付。申亞係嚴肅承諾，但本來一百三十七億元至一百四十五億元嘅直接成本開支預算，話縮就縮，變成五十幾億就搞掂，真係兒戲草率到痹！

工聯會都唔想支持

民政事務局常秘楊立門尋日仲要死撐，話被撤銷提升規模嘅元朗、沙田同大埔三個室內運動場，削減部分只係貴賓室、新聞發布室、體檢設備同副場啫，可改成臨時搭建喎！個貴賓室鑲金㗎，可以慳番成八十億元？

好心政府咪再強行解畫啦，盞令申亞呢個爛攤子愈搞愈爛，今次政府為申亞造數，目的係劈價吸客，點知結果變成趕客！本來立法會內多個建制派同泛民主派政黨已表態反對申亞，尋日又多一個團體。工聯會本來有可能撐申亞，但睇見政府出到造數那渣招，反而唔想支持。工聯會黨團召集人黃國健直言，政府今次大減價行動好肉酸，畀人感覺申亞係為做而做。

冇見得人嘅主場地

元朗區議會主席梁志祥亦批評，政府最初游說該區區議員支持申亞，理由之一，正係藉申辦亞運會契機，提升區內康體設施，當區議員紛紛落疊，政府卻撤銷提升元朗室內體育館計劃，畀人印象係過橋抽板，估計有本來支持申亞嘅區議員，轉而反對申亞。

沙田區議員何厚祥揶揄，大劈價後嘅申亞計劃，就算真係有機會成功申辦，都係半桶水亞運會，冇見得人嘅主場地，唔湯唔水，盞招人笑柄兼嘥錢！