政情：搞搞政：社民連想抬周澄入立會

社民連倒閣風波啱啱平息，但黨內勢力互不妥協嘅拉鋸戰卻持續，早前辭去秘書長一職嘅社民連行委季詩傑爆料話，半年前五區補選時，佢哋同「大專2012」嘅同學仔合作無間，事後社民連對周澄一直念念不忘，希望招攬佢入黨，仲想佢喺來屆立會選舉擔大旗，夥拍長毛梁國雄齊齊出選新界東。

唔講唔知，當時風頭十足嘅周澄事後被指同社民連一個行委私交甚篤。消息話，社民連依家喺立法會有三席，佢哋有意喺下屆立法會選舉時重新布陣，由長毛退落參選名單第二名，為新人抬轎，期望喺新東取下兩席，而早前喺補選中成功於新東取下逾萬七張票嘅周澄，正係社民連嘅理想人選。

不過，社民連呢個如意算盤暫時打唔響，事關雖然周澄都有意入黨，但佢家陣仲喺馬尼拉幫緊一個非牟利組織做嘢，要二○一二年初先返嚟。如果要趕及參與一二年嘅立會選舉，就未必符合到選舉條例所規定嘅最低留港限制嘞。