Sun世代：生意紅娘刨書發達

俗語有云「書中自有黃金屋」，被封為「生意紅娘」的創業才俊李根興（Edwin）也沒有發達捷徑，全靠看書掘金，日日狂刨創業、投資書籍，加上「工作狂」性格，視睇舖、睇人流為假日娛樂，終帶來過千萬生意額。問他如何保持衝勁，他反覆強調：「唔需要搵份最鍾意嘅工，只要覺得依家做嘅已經最鍾意，就好似娶太太唔一定係最鍾意嘅女人。」 　 　 　 　 　 　 　

一提起Edwin，即記得他是香港商機創辦人，專門買賣公司，如茶餐廳、補習社、美容院。他的中介公司成立九年，生意接踵而來，更曾錄得一年三千萬元生意額。他原本是一位平步青雲的金融才俊，先擔任香港的證券行分析員，及後跳槽至紐約的投資銀行協助大公司上市，最終因九一一恐怖襲擊而被炒魷魚，那時他只有二十六歲。對於被裁走，「覺得好冇面，前路茫茫，唔開心到喊。」

風光背後有苦自己知

躋身投行往往引來艷羨目光，但他承認風光背後，卻是有苦自己知。「話就話幫公司上市，其實我只係捱夜睇招股書，睇上市文件有冇串錯字、格式啱唔啱、有冇隔行。」做這些「校對」工作，捱至金睛火眼，卻無換來成就感，「有次睇漏眼，畀老細發現咗，佢一巴摑埋嚟，我諗過好唔好出聲，但最後忍住咗，心諗，冇嘢衰得過今次喇啩？」不過，捱了一巴掌，仍留不住工作。

不甘事業就此停步，他回港創業的第一個決定，是走進書店買書，包括一本叫《Buying Your Own Business》的財金書籍。「嗰陣睇咗好多書，研究點樣開餐廳、士多等等，又睇吓報紙分類廣告，見到有人賣舖搵頂讓，就打電話問價，再幫佢搵買家。」從此，他便開始買賣業務，電話打了半年，終於從買賣美容院中賺到三千五百元。公司由只有他一個老闆兼職員，做到現在有三十多人的團隊。

不過，冷水卻由多方面潑過來，「阿爸第一個反對，覺得冇前途；表哥仲話嘥咗我，買賣雞鴨檔、茶餐廳，不如做啲大deal。」他感慨在創業初期，其中一單生意要到雞檔視察，和雞販傾條件，當時環境混合了多樣屎味，感覺殊不好受，「嗰時我又諗，依家喺咁嘅環境做生意，應該係最差㗎喇，克服到就變得更strong（強）。」

不忘養生食核桃補腦

為了生意，Edwin犧牲不少與家人相處的時間，連休息日亦是他工作一部分，就連嗜好亦異於一般生意人。「網球、高爾夫球我都冇興趣，最多跑步或行吓街、睇吓舖頭，可以由中環行去銅鑼灣，再去北角返轉頭。」至於放工後的晚餐，他有時就選擇到一些快將結業的餐廳，方便一邊進食一邊觀察附近人流，判斷該店舖是否買得過。

訪問中，記者留意到他的辦公室除了有「書山」，還備有一小碟杞子，洗淨風乾便成為他的零食。想不到「忙到飛起」的他不忘養生，「杞子明目，我平時仲會食杏仁、核桃，可以補腦。」他還喜歡飲豆奶，貪其有益健康，口渴就呷一口。

李根興 Edwin 小檔案

年齡：35歲

現職：香港商機創辦人及行政總裁

學歷：美國南加州大學金融理學士、會計學碩士

家庭狀況：已婚，育有兩歲多及七個月大女兒

興趣：閱讀、行街、跑步