政情:靳棣強家人聯辦畫展

政情:靳棣強家人聯辦畫展

我哋都知著名藝術家靳棣強嘅藝術天分高,原來佢家族中人亦才華洋溢。靳氏十幾位家族成員早前齊齊舉辦藝術展,靳棣強嘅細佬杰強講起今次搞聯展嘅因由,始於三年前佢由美國返港舉辦畫展,佢嘅堂妹寶潔提議不如搞個靳氏族人畫展,籌辦咗兩年終於成事。散居中、港、台、美、加同埋歐洲嘅家庭成員今次都返港參展,連已經仙遊嘅長輩畫作都有得睇。

睇爺爺畫壁畫啟發潛能

靳棣強話,今次除以藝術會友外,最珍貴嘅係成家人有機會排除萬難聚首一堂,好似杰強就同近四十年未見嘅堂妹羽屏重逢,大家有幾激動唔難想像。

中聯辦宣傳文體部部長郝鐵川嚟自上海,佢對喺上海發展嘅靳羽西最熟悉,佢太太更加係羽西嘅粉絲,事關羽西有自己品牌嘅化妝品、家品設計,喺上海家喻戶曉。佢又話原本唔信遺傳基因呢回事,但今次睇到靳家人才濟濟,不得不信啦!

靳棣強就謙稱佢哋係受到環境影響,好似佢哋兩兄弟細個時成日睇爺爺為廟宇畫壁畫,先至啟發佢哋嘅潛能。依家佢嘅囡囡做社工,囝囝就喺網上講波,按自己興趣發展,未必同藝術有關㗎!

郝鐵川(右)對靳棣強(左)家族成員嘅藝術才華十分欣賞。

精於水墨畫同書法嘅靳杰強(左)已移居美國。旁為靳棣強夫婦。