政情:日本總領事旺角學中文

政情:日本總領事旺角學中文

上月履新嘅日本駐港總領事隈丸優次,日前致函傳媒在內嘅香港各界朋友,正式打個招呼,呢封英文信件提到佢同香港淵源甚深,七五年加入外務省冇耐,已被調派香港工作,佢嘅中文就係嗰陣時喺旺角啲補習社學番嚟嘅。

隈丸優次通曉中文,歷任日本駐華大使館參事、公使,○五年擔任上海總領事,不時就中日關係問題發表意見,係一位精通中日關係嘅資深外交官。佢○八年調派泰國,上月來港出任駐港總領事。佢喺信中提到,原來佢嘅外交官生涯亦係由香港做起點,二十幾年前佢被派調來港之後,去旺角啲語言學校學中文,雖然功課繁忙,但平日仍會抽時間四圍逛。

中日關係近期因釣魚島事件再起波瀾,隈丸優次肩負重責,佢喺信中語重心長咁話,對新職感到榮幸,希望能強化中日關係喎!

隈丸優次上世紀曾派駐香港,仲喺旺角嘅語言學校學中文。 日本駐港總領事館網頁圖片