政情：搞搞政：鬍鬚曾遲鈍否定雙底衰退

政府高官行事唔係常人可以理解，舊年年底香港經濟開始喺金融海嘯黑暗隧道漸見曙光時，煲呔曾突然提出雙底衰退論，預言今年年中經濟有可能再衰退。佢嘅「真兄弟」、財爺鬍鬚曾隨即大唱雙簧配合，恫嚇港人，都係想壓低公眾對預算案派糖嘅期望。

事實證明，孖曾嘅水晶球唔靈驗。鬍鬚曾尋日喺個人網誌撰文，大談英、美、日多國推出嘅量化寬鬆同縮緊財政政策措施，同埋對香港有乜影響，全屬「阿媽係女人」嘅道理，無甚可觀，但就喺洋洋字海之中，好唔起眼咁「攝」咗一句：「全球經濟出現二次探底的機會看來已經降低」，為政府吹大咗嘅雙底衰退論首度認衰同補鑊。

鬍鬚曾已經好多次計錯數，經濟預測錯、財政赤字又錯，而當日佢兩兄弟嘅講法，令財金界預測樓同股起碼仲可以炒多半年，而鬍鬚曾依家先話雙底衰退機會唔大，真係後知後覺，反應遲鈍！

雖然雙底衰退論已破，政府再唔能夠以外圍經濟有好大隱憂做藉口拒絕派糖，明年三月預算案鬍鬚曾應該識做，大力拉近貧富懸殊，做番啲好事！