政情:金勞詹淺嘗靚蟹過口癮

政情:金勞詹淺嘗靚蟹過口癮

依家大閘蟹當造,識飲識食嘅立法會金融服務界代表「金勞詹」詹培忠早前去咗出名蟹靚嘅中華出入口商會大快朵頤。金勞詹出手闊綽,唔靚唔食,佢揀得嘅隻隻都有五両重,絕對係真材實料。

識歎大閘蟹嘅人都知道「九月圓臍十月尖」,意思係農曆九月食雌蟹、十月食雄蟹嘅道理,金勞詹品嘗嘅正正係蟹膏軟滑嘅雄蟹。佢話之所以揀中華出入口商會會所歎蟹,除咗因為呢度蟹嘅質素有保證,亦同其他配套不無關係,事關食大閘蟹必須配以鎮江醋,會所係以秘方烹調,加上佢哋用老薑、杞子同圓肉炮製嘅薑茶,真係食多幾隻都唔怕寒。

金勞詹前年曾患癌,雖然康復無恙,但大閘蟹呢啲膽固醇咁高都係適可而止好啲,難怪佢幾鍾意食都好,只係淺嘗食一隻過吓癮就算。

身體要緊,對住五両重靚蟹公嘅金勞詹都好忍得口,只係食一隻。