政情：楊國佳唔敢睇太淡美元
政情：楊國佳唔敢睇太淡美元
多名財金高官話熱錢湧港，仲出口術話市況將出現泡沫，但小市民依然炒得不亦樂乎。縱橫金融界多年嘅工廈大王楊耀松兒子Alexander楊國佳分享亂世自保秘笈，就係多做套戥。佢認為唔少港人嘅投資方向太單一，唔係買升，就係買跌，風高浪急下，好易輸大錢。
盛傳家族身家逾百億元嘅Alexander，投資眼光獨到，曾喺滙豐股價跌至恐慌性低位時撈底，持貨至今。早前佢出席一個公開活動，大談近兩年都係以套戥方式投資，既買升，亦買跌。佢舉例話，喜歡將滙豐用作投資衍生工具嘅實貨，同時玩decumulator，賺取當中差價。
依家呢個時候，佢話要用反傳統智慧去投資，切忌羊群心態，例如當近日市場一窩蜂睇淡美元、追捧澳元時，佢反而唔敢睇得太淡，因為大戶最鍾意出把戲，放風引人投注喺某一方，然後反其道而行，大殺三方。
股市風高浪急，楊國佳話投資最緊要做套戥，減低損失。