政情：立會保安險爆工業行動

立法會保安份工近年愈嚟愈難頂，除咗逢禮拜三嘅立法會大會例必加班外，平日都隨時有OT需要，再加上社民連三子經常喺議事廳做騷，同保安嘅肢體接觸時有發生，喺混亂之中，保安又曾經整損手、撞親腰，但面對呢三位尊貴議員，保安敢怒而不敢言。

一直以嚟，立法會保安都有超時補水制度，但由今個立法年度開始，佢哋申請補水嘅手續繁複咗好多，除要事前申請外，仲要解釋原因，一眾保安一時間難以適應，事關好多時加班都係臨時需要，根本無法預計。更令佢哋氣結嘅係，一旦病咗要放病假，秘書處就將佢哋嘅病假計埋落超時補假嚟放，變相剋扣咗佢哋嘅補假。

據講，依家秘書處各部門申請補水都用統一表格，令文件工作驟然增多，不過咁都係為咗令運作更為制度化，日後搬去添馬艦新大樓，保安大增，更加唔可以冇規冇矩。咁規矩執行嚴咗，自然反彈就多咗。歸根究柢，政府同班議員都有責任，若果政府推出嚟嘅政策得人心，議員又少啲無謂嘅爭拗，社會怨氣少啲，打工仔捱都捱得順氣啲啦！

聽聞保安早前諗過發起工業行動以示不滿，最終去咗搵工聯會立法會議員王國興幫手，經過一輪斡旋，紛爭得到平息，病假冇再被當成超時補假放，一場由立法會引爆嘅勞資問題得以解決。