政情：梁美芬箍票碼住大靠山

工聯會會長鄭耀棠早前先禮後兵，同各路建制派人馬表明，二○一二年立法會選舉唔再為人抬轎，為冇政黨選舉機器支持嘅立法會九龍西議員梁美芬選情添上陰霾。不過，建制派票倉又豈止工聯會一個？九龍社團聯會喺九龍東、西就手握共十五萬票，梁美芬最近已經緊緊攬實呢座大靠山，為未來兩年兩場直選箍票。

兩議辦有分工

尋日梁美芬喺深水埗區嘅第二個議員辦事處開幕，地點位處石硤尾，明掘基層票，同佢接近中產票源泓景臺嘅第一個議辦有明確分工，為兩年後競逐連任九龍西鋪路。尋日除中聯辦官員同財經事務及庫務局副局長梁鳳儀畀面出席外，九龍社團聯會亦派副會長吳日章到場，明撐梁美芬。

回歸後至成立嘅九龍社團聯會，論名氣未必及工聯會大，但一樣同屬中央嫡系組織，負責九龍區票源，每次直選都為建制派喺九龍東同九龍西默默發功。梁美芬係聯會名譽會長，屬掛名性質，但據政界消息稱，近月陷入唔再獲工聯會過票危機嘅梁美芬，同聯會愈走愈近，並已得到聯會首肯力撐，無論明年區議會選舉中喺黃埔東選區競逐連任，定係後年立法會選舉再戰九龍西，都會有聯會幫手抬轎，新鮮熱辣例子就係上禮拜佢隨聯會訪京。

搭單上京叩門

九龍社團聯會有個慣例，每四年訪京一次，每次時間唔遲唔早都安排喺區議會選舉前一年嘅暑假，呢個動作可被解讀為中央喺大戰部署前期向九龍各區樁腳激勵士氣，團結軍心。上禮拜聯會訪港澳辦，梁美芬搭單隨團北上，政治味道濃烈，估計係為未來兩場直選大戰上京搵定靠山，如果畀佢叩門成功，建制派啲基本盤就會跟最高指示一一歸位，好過喺香港逐家逐戶拍門箍票啦。

尋日問梁美芬係咪已獲九龍社團聯會力撐，佢不置可否，稱訪京後同聯會熟咗好多，而佢喺○八年九龍西一役曾獲幾個社團幫忙，聯會係其中一個，即係承認聯會係佢嘅票源大水喉。