政情：搞搞政：白鴿黨妄想立會爆樽

立法會議事廳係莊嚴嘅議會殿堂，由港英時期開始就嚴管出入，又對議員喺議事廳嘅行為有嚴格規範，尋日白鴿黨成員、內會副主席「肥仔明」李華明暫代立法會主席一職，身負主持大會嘅重責，結果泛民一度想越軌破禁令，公然喺議事廳開香檳，不過佢哋嘅謀反計劃最終都失敗。

尋日立法會開大會，議員激辯要求內地釋放異見人士兼諾貝爾和平獎得主劉曉波嘅議案，主席可能因為醫肚離席，適逢內會主席劉健儀唔喺議事廳，肥仔明於是越級擔任代主席，民主派終於重奪議會主導權一粒鐘咁多。白鴿仔「高達」李永達發言時，涉嫌展示道具，佢指一指早就放喺枱面上嘅香檳，話劉曉波獲諾貝爾獎，好值得開香檳慶祝，可惜議事規則唔准，呼籲議員一陣入前廳一齊開香檳慶祝咁話。

立會主席及時返歸

緊接高達發言嘅鄭家富自爆，其實佢哋真係想趁肥仔明做代主席時，快快手開咗支香檳賀吓佢㗎，只係未等到高達發言，主席就返咗嚟，搞到大家冇戲唱。回歸後，泛民多次派員競逐立法會主席，但都鎩羽而歸，依家睇嚟，佢哋想搶個主席位返嚟，可能都有另類作用㗎。