政情：富貴黨投行才俊攻山頂

明年嘅區議會選舉係立法會超級議席嘅前哨戰，山頂選區傳聞多多，近日富貴黨嘅消息話，前主席田北俊已放棄競逐「超級議席」，黨內已鎖定派投行青年才俊陳浩濂（圖）挑戰公文袋嘅陳淑莊。

陳浩濂係乜水？佢上年先至加入富貴黨，但佢嘅專業背景好快被高層相中。呢位擁有美國密歇根大學經濟學同心理學雙學位嘅富貴黨中半山社區幹事，三十三歲就晉升到投資銀行董事總經理，現為兩位年幼女兒嘅父親，佢嘅專業背景同良好形象，啱晒專業及工商界雲集嘅山頂選區。富貴黨呢一着，都係吸取○七年區會選舉敗仗經驗，同時亦表達拒絕讓位。

匯賢智庫葉劉淑儀早前曾向富貴黨叩門，探路問能否喺山頂區「讓路」，等佢單挑陳淑莊，最終無功而還。富貴黨咁堅決請葉劉食檸檬，一場大戰睇怕唔少得。富貴黨嘅盤算係，公文袋今年年中夥拍社民連發動「五區公投」，政治意識形態激進，或已嚇怕工商界同中產，所以佢哋搵個理性中產出嚟，希望收復山頂呢塊失落之地。