政情：郭炳江獲頒博士銜 母弟快閃

理工大學尋日舉行畢業典禮暨博士學位頒授典禮，新鴻基地產副主席郭炳江（Thomas）獲頒授榮譽博士學位，郭老太鄺肖卿同Thomas胞弟郭炳聯都有現身撐場，但佢哋好快離開，有人問Thomas點解啲家人唔睇埋頒授儀式就咁快走？Thomas話：「係呀，費事畀記者圍嘛！」

頒授典禮喺下晝三點開始，儀式開始前半個鐘，先見郭老太同郭炳聯到場，三人拉埋理大校長唐偉章合照後，郭老太同郭炳聯就急急腳離開，太太亦唔見人，Thomas笑笑口咁話：「我太太經常失蹤㗎啦！」其實佢尋日出席政府拍賣九龍塘延文禮士道地皮嘅活動時，已經擺明車馬唔講家族嘅事。

尋日另外仲有三人獲理大頒授榮譽博士學位，包括「玩具大王」蔡志明、專攻中國研究嘅哈佛學者柯偉林同兒童福利護理先驅馬婉麗。蔡志明太太李惠莉、大女蔡加敏及夫婿馬鴻銘、女兒蔡加怡同細仔蔡加讚，就連大哥及大嫂、親家馬介璋，尋日都有出席儀式。

蔡志明早已取得哈爾濱工業大學博士學位，佢解釋，十幾年前諗住報讀清華大學，但有人建議佢報讀哈爾濱工業大學，最終用一年幾時間完成課程，佢話就算幾辛苦都值得喎！