政情：大輝撐林公公護唐唐

立法會尋日召開大會，議員大翻政務司司長唐唐九月二號訪京嘅舊帳，質疑佢當日滾水淥腳咁訪京，但上到京城行程神秘，更一度失蹤七個鐘，要求唐唐解釋。代答質詢嘅係政制及內地事務局局長林公公，但佢全場好似人肉錄音機咁，點都唔肯披露，即使議員使出激將法都冇用。

稱高官唔使披露外訪行程

林公公尋日喺會上話，唐唐當日嘅行程，港府要公布嘅已經公布晒，冇嘢要補充，但就話一啲有例行性質，又或者仲喺磋商階段嘅會議，港府未必會公布，喺適當嘅時候先會公開交代。白鴿黨劉慧卿聽到林公公咁答梗係火滾，怒斥佢呢個答案「非常混帳」。其黨友李永達更寸爆林公公：「佢（唐唐）又唔係去揼骨按摩、唔係去食北京填鴨、唔係私下買長城紅酒，究竟去做乜？」

工業界議員林大輝忽然挺身護唐唐，問林公公世界上有咩國家係明文規定高官一定要將佢外訪行程「巨細無遺」咁向大眾交代？林公公即時話英國同加拿大嘅國會都冇咁嘅規定，仲公然喺議事廳多謝大輝，話大輝畀咗個機會佢澄清喎。心水清嘅人都知大輝救緊邊個啦！