政情：毓民眼疾未愈又撼親頭
政情：毓民眼疾未愈又撼親頭
社民連內鬥風波愈演愈烈，嚟緊禮拜日就會舉行特別會議，就黨內有人要求推翻內閣嘅動議投票，創黨主席黃毓民啱啱眼疾纏身，名副其實「冇眼睇」。
話說毓民早前驗眼時發現兩隻眼都問題多多，右眼有黃斑病變、眼角膜受損同埋少少白內障，上禮拜三的起心肝一次過做手術處理，本來預咗四、五日就可以出院，點知病情比預計嘅嚴重，最終要留院起碼十日。如果最後要延長留院，即係參加唔到特別大會，真係名副其實「冇眼睇」倒閣。
左眼明年再做手術
不過毓民尋日特登向醫院請假返立法會講劉曉波動議，見佢除咗將右眼包到實一實外，額頭仲損咗一撻。原來佢做完手術後一直瞓得唔好，夜晚冇嘢做惟有周圍行，點知一個唔小心個頭撼咗埋牆，搞到傷口愈嚟愈多。毓民話左眼嘅白內障仲未搞得掂，下年一月仲要再做手術。
毓民呢頭右眼做完手術未拆紗布，嗰頭又撼親頭，認真黑仔。