政情：田二少玩罷食被窒快餐少食

連鎖快餐集團大家樂更改員工薪酬計算方法，「明加暗減」消息一出，引起勞工界、學界同泛民政黨不滿，嚟緊禮拜二（九號）仲計劃搞個罷食行動添，日前富貴黨未來副主席田北辰明言對事件反感，仲話會參加罷食添。呢句話一出，好似摑咗黨友、同曾為大家樂護航嘅飲食界立法會議員張宇人一巴。黨內矛盾未解決，商界矛盾又殺到，經濟動力嘅梁君彥尋日就質疑田二少罷食之舉有抽水之嫌，仲質疑佢對上一次食快餐係幾時？

「有咩着數就撲出嚟」

田二少前晚喺電台話，自己都做老闆，平時唔會諗節流，只係集中思考開源嘅方法，仲話對事件反感，兼會參加禮拜二嘅罷食，事後仲畀黨友話佢唔熟悉飲食業。時裝連鎖店老闆罷食大家樂嘅消息一出，同佢哋有牙齒印嘅政界人物梗係唔放過啦！兩年前退出富貴黨嘅「經濟動力」成員梁君彥尋日被問到會唔會參與罷食時，即時話自己「一路都唔食大家樂」，皆因公司附近冇咁話，仲認為冇罷食嘅必要。

但係田二少講明會參加罷食噃！梁君彥聞言即時失笑，嗌記者「唔好佢講乜你就信」，仲批評田二少「依家有咩着數就撲出嚟」。講講吓，佢又嗌記者去問田二少，上次去大家樂食咗乜，睇睇佢記唔記得喎。言下之意，即係話田二少呢啲有錢人平時根本唔會光顧快餐店，話要罷食只係廢話。另有商界人士對田二少嘅表態好有意見，質疑佢甚至富貴黨攪亂檔，睇嚟商界嘅快餐戰會繼續升溫，一場內訌在所難免。

關愛基金形象盡毀

白鴿黨嘅李華明見到佢哋七國咁亂，都加埋把口，諷刺煲呔曾搞個「關愛基金」出嚟，使成一百億，但係大家樂飯鐘事件一爆，即刻搞到關愛基金辛辛苦苦儲嚟嘅基層好感一鋪清袋。佢仲話，家吓商界捐多幾多錢，都冇辦法改善形象啦！