SUN世代：時裝達人為香港品牌開路

品牌達人鍾國斌（Felix），生於紡織世家，打理家族生意理應一切順境，但營商不交學費不知艱難，Felix當家作主做紡織界中小企，首遇工廠北移要轉型，十年後毅然創立自家品牌，卻慘淡收場。Felix坦言「失敗唔怕講」，皆因是中小企恒常有之小故事。去年他又有「新計」，打正旗號幫本地新進設計師擦亮「香港設計」品牌，進攻內地市場。「上次搞品牌真係燒銀紙，但就學到搞fashion係咩一回事。」

現年四十六歲的Felix，最為人熟悉是他「香港製衣同業協進會會長」的頭銜。製衣廠被認為是夕陽工業，人人都以為製衣已經無得搞，但他幽默地告訴大家，這個行業只是轉型中，並非消失了，事實上他仍然搞得如火如荼。不過，他也承認打從二十二年前接棒打理父親一手創立的紡織廠開始，一切並非想像中順利。

「上世紀八十年代，製衣出口係香港經濟支柱之一，做廠嘅生意好好。」當時香港遍地黃金，身為紡織廠太子的Felix亦生活無憂，十六歲時被送往英國留學，住寄宿學校，凌晨兩、三點就去「蒲」。二十三歲回港，由於大學時主修建築測量，他便加入建築公司，打算由低做起，當時正值中英談判時期，樓市低迷，「內部認購杏花邨都係五百蚊一呎，心諗市道咁差，幾時先發圍？」

開舖做老襯蝕足七位數

為盤算更好前途，Felix選擇回到紡織廠學做生意，誰知兩年後便發生六四事件，隨後的九十年代，大部分本地工廠更搬到內地。「當時諗『唉！真係老襯囉！』去到九七前，我啲舊同學炒樓炒到幾勁啊！」為了轉型，他在二○○○年自創一家時裝公司，負責一條龍的品牌設計、推廣、製造及銷售，銳意在上海開設連鎖專門店，豈料生意毫無起色，加上○三年沙士殺到，「開咗五間舖就斬纜喇，蝕咗成七位數字。」

用錢鋪的血路走不通，他退一步看到轉機。「原來單打獨鬥喺內地行唔通。」生意失敗並無令Felix洩氣，反學懂如何求存。Felix說：「其實香港人設計嘅衫喺內地依然有吸引力，但新進品牌單獨做根本谷唔起，上海嘅商場唔會畀個靚位你租。」

做時裝講求創新大膽，Felix亦是同道中人，「我同內地商場發展商傾，一租二萬呎，專賣香港三十個新牌子靚衫，點會唔租畀我？新品牌、新設計師始終唔夠網絡，我依家做嘅就係提供一個平台，畀佢哋發揮。」目前，上海浦東和新天地、成都、蘇州都有「香港設計」概念大型商場。對於生意要推倒重來，他滿不在乎，「呢啲係中小企失敗嘅故事，我唔怕講，多啲失敗經驗，先知點樣成功！」

鍾國斌 Felix 小檔案

年齡：46歲

學歷：英國Robert Gordon's Institute of Technology建築測量系學士、英國Stirling University工商管理（金融）碩士

現職：香港品牌集團有限公司主席

公職：香港製衣同業協進會

會長

香港設計中心委員

香港品牌發展局委員

中華廠商會會董

興趣：高爾夫球、游水、搵好嘢食