政情：盧文端世博閉幕晚會罰企
政情：盧文端世博閉幕晚會罰企
上海世博曲終人散，有八個港澳全國政協委員獲上海市海外聯誼會邀請出席閉幕禮，香港有六個，包括全國政協委員盧文端、專資會創會主席容永祺等。
盧文端同容永祺都話參加三十一號壓軸節目相當開心，特別係嚟自唔同國家同種族嘅世博工作人員一齊載歌載舞，現場氣氛令佢哋好感動。不過，盧文端話唯一美中不足係閉幕前嘅招待晚會，只有國家元首有份出席中國領導人設嘅晚宴，其他嘉賓就要「罰企」食自助餐，連有份喺高峰論壇上主講國際金融嘅黑石集團大中華區主席梁錦松，都要同太太伏明霞企埋一份，相當尷尬。
盧文端話企喺度食嘢好唔自然，連佢都食唔飽，散場後同太太去食蟹宴，勁擦三隻大閘蟹填肚。
左起：盧文端、李德麟、胡寶琳、廖長江同容永祺，一齊出席上海世博閉幕禮。 相片由容永祺提供