政情：鬍鬚曾搵金勞詹問前程

財爺鬍鬚曾曾被視為疑似特首候選人之一，點知舊年九月尾因急性心臟病而要入院做通波仔手術，此後外界開始將佢剔出名單之外。立法會金融服務界議員「金勞詹」詹培忠尋日向記者爆料，話大約半年前鬍鬚曾請教佢自己仕途應該點走落去，雖然金勞詹冇透露鬍鬚曾當時嘅表情語氣，但聽得出鬍鬚曾已深知自己同特首寶座無緣。

於是金勞詹向鬍鬚曾教路，叫佢一係繼續做財爺，一係就升呢做政務司司長（CS）。但CS之位大有儲君意味，將來有望坐正特首寶座，既然鬍鬚曾冇乜機會做特首，仲畀佢做CS嚟做乜？至於鬍鬚曾聽完有乜嘢反應，金勞詹就冇講落去嘞。

至於二○一二年立法會選舉，金勞詹實牙實齒咁話佢同立法會中總代表黃宜弘都會退下火線，是真是假大家要拭目以待。佢徒弟旅遊界謝偉俊（Paul）會點呢？佢話阿Paul有心去直選，去邊區就未知。

講起身兼行政會議成員嘅新界鄉議局主席劉皇發，前排因漏報事件搞到一身蟻，咁啱鄉議局副主席林偉強嘅支持者又喺坪洲鄉事委員會街坊代表選舉輸咗，意味林偉強出年要同坪洲鄉委會主席同離島區議會主席之位道別。金勞詹打趣咁話，鄉議局新大樓未入伙，正副主席已先後出事，要搵人睇睇風水喇！