政情：喬老爺南下授課講政改？

港區全國人大代表收到通知，嚟緊九號同十號上深圳上學習班，就最近十七屆五中全會同「十二五」規劃補課，緊貼國情。最特別嘅係，通知講明全國人大常委會副秘書長喬曉陽會專登南下，擔任補課老師一職。消息一出，引起政界揣測，往年每年三月「兩會」前夕，港區人大、政協都獲安排上深圳開預備會，但好似下禮拜咁中間加插一堂國情雞精班，過往實在少見。

眾所周知，喬老爺係中央負責睇住香港政改嘅重員，每次政改行到關鍵路口，喬老爺都會現身，為大家解惑釋疑。○七年中央否決二○一二「雙普選」一役，喬老爺南下香港，以座談會形式舌戰民主派，令人印象深刻。到今年六月立法會通過政改方案，港區全國人大考察南京，中央就安排特別節目，派喬老爺專程飛去南京，為港區全國人大舉辦政改座談會，解釋中央最終決定接納白鴿黨區議會方案嘅原委，以安撫建制派質疑中央扶持白鴿黨嘅情緒。下禮拜喬老爺南下深圳會晤港區全國人大，難免惹人遐想，令人揣測會唔會代中央傳遞有關政改嘅重要訊息？

有港區全國人大表示，喬老爺南下授課，安排喺特區政府公布政改本地立法建議後嘅一個禮拜，時間太巧合，加上立法建議仍有若干問題懸而未解，好似民主派要求一次過就普選時間表立法，親中陣營到底應該點對待，一直未獲指示。今次喬老爺南下，會唔會順便收風，甚至係代中央「宣旨」呢？大家拭目以待。