政情：搞搞政：梁美芬幫何鍾泰撈票

立法會九龍西直選議員兼西九新動力主席梁美芬，為壯大區議會同立法會選舉實力，早前拉攏工程界加入自己陣營，向區民免費提供同屋宇工程有關嘅專業諮詢服務。梁美芬尋日再出招，但今次輪到佢幫番工程界嘞，公布對西九文化區嘅一系列建議，要求呢個二百一十六億元嘅世紀工程，設計部分要確保本地建築師可分一杯羹，擺明幫番工程界爭飯碗。

「西九宣言」帶挈工程界

西九新動力同工程界社促會尋日宣布「共建西九宣言」，拋出一整套打造西九文化區嘅建議，好似改善維港水質、用交通配套帶旺周邊地區，同埋設立「少數民族藝術館」咁。有人話「得西九，得天下」，對九龍西議員嚟講，一定要喺西九議題發聲，但梁美芬仲順手拉埋工程界嘅票，話會求見政府主事官員，要求西九估計約十億元嘅設計費用，確保本港中小型建築師行都有機會中標。

梁美芬係專業會議成員，同僚兼盟友之一正係工程界議員何鍾泰，今次梁美芬喺「西九宣言」加入工程界權益元素，可以話係曲線幫何鍾泰鞏固喺業界嘅票源。