政情：肥平話全港都係客家人

身為客家人嘅金利來行政總裁Ricky曾智明，尋日帶頭搞全港首個客家文化節，喺僅存嘅客家式大宅沙田曾大屋筵開六圍，請鄉里擦客家菜，包括客家鹽焗雞、黃酒雞同梅菜香芋扣肉等。

大飽口福之後，民政事務局前局長何志平以半個客家人身份帶大家尋根。肥平話媽媽係客家人，所以佢算係半個客家人，但自爆唔識講客家話，只係醉心研究客家文化。佢分享自己嘅獨到見解，話廣義嚟講，全港七百幾萬港人都係客家人噃。係真唔係真呀？

肥平研究過，客家人並非指某一個特定社群，但凡客居喺香港嘅港人，都係客家人，大家應該認識同珍惜客家文化。

客家文化節嚟緊將有連串活動，包括客家歷史展覽、客家歌舞表演，最搞鬼莫過於一場「客家美食之炆豬肉大賽」，香港六家食肆將喺林村較勁，爭奪炆豬肉大王寶座。原來Ricky靜雞雞以香港嘉應商會名義捐出三十萬元，聯同其他客屬團體，齊齊贊助客家文化節。