政情：林健鋒拖篋入馬場
政情：林健鋒拖篋入馬場
前日喺快活谷馬場見到經濟動力立法會議員Jeffrey林健鋒，佢戴咗條滿布行李篋同雀鳥嘅粉紅色Hermes靚呔，顯得愉快輕鬆，佢笑住話啲行李篋係用嚟贏馬之後運銀紙走㗎！
當日Jeffrey出席工總慶祝五十周年嘅盃賽盛事，佢手氣唔錯，但只係小注怡情，雖然場場有錢收，但都未至於要出動拖篋咁誇張。佢話條呔係太太幫佢買嘅，間中佢都會買一、兩條，但基本上由太太話晒事。
咁即係佢好欣賞太太眼光？又唔係喎。實情係佢好講究喺唔同場合配搭唔同領呔，佢牙擦擦咁話：「好似有時同老婆喺街拖手仔，都要同老婆嘅衣着襯吓色嘛！」所以佢乜嘢顏色嘅領呔都有。