政情：林公公開金口自評花名
林公公話作為官員，講嘢同傳達嘅訊息最重要係清晰同準繩，至於用乜科技就見仁見智。雖然只係短短一句，但係出自把口密過夾萬嘅人肉錄音機把口，呢個答案其實已經相當難得；不過，將錄音機視為科技，似乎又過分咗少少囉。
尋日講過林公公前日接受電台訪問時疑似漏咗口風，暗示下屆唔會再做政制相關工作，佢尋晚再次畀人問及呢個問題，佢今次明顯小心咗好多，冇再漏口風，只係重複又重複咁話，香港喺政制發展方面有好多得着，加上今年通過政改，算係好大進步。
