政情：錢大康踩完單車至返工
政情：錢大康踩完單車至返工
喺香港科技大學過檔去香港大學做首席副校長嘅錢大康啱啱履任兩個月，搬咗去港大沙灣徑宿舍，佢將踩單車嘅習慣由科大帶埋去港大，每日晨早六點都會落街踩單車，由宿舍踩去摩星嶺再折返，踩到滿頭大汗至返工，唔怪得咁fit啦！
雖然錢副校長着到全副武裝咁踩單車，但佢就否認係單車高手，仲話曾經幾度仆親：「一條平路中間突然有阻礙物，就最考起我，好彩冇大礙。」
原來錢副校長嘅生活時序都能人所不能，雖然每日都瞓六至八粒鐘，但就採用「斬件式」睡眠法，晨咁早踩單車後，至夜晚差唔多九點鐘就會自動瞓着，深夜兩、三點又會中途起身，覆完工作上嘅電郵後又瞓過，真係相當唔得閒。
每日晨咁早，錢大康都會着到全副武裝咁踩單車。 港大提供圖片