政情：吳秋北勇闖勞顧會

勞工顧問委員會一向係勞工界直接同政府表達意見嘅重地，之前討論過極具爭議性嘅最低工資立法，依家就等臨時最低工資委員會向政府提交報告後，預計明年中前可以實施。嚟緊勞顧會仲有一個大project，呢個係好惹火嘅議題，相信勞資雙方屆時又會火併，就係研究標準工時嘞，所以好多工會都希望爭奪席位以便發聲。

11人爭5個位

新一屆勞顧會選舉喺呢個月二十七號舉行，由四百一十六個已登記成為選舉單位僱員工會委任代表喺選舉當日投票。上個月二十一號啱啱截止提名，今次總共有十一人爭五個位，其中四個係角逐連任，其餘七個候選人中，最矚目嘅莫過於工聯會最年輕嘅理事長吳秋北。

吳秋北雖然係新丁，亦被外界冠以「唔揪得」嘅花名，但佢係工聯會重點栽培對象，工聯會誓必出盡全力為佢拉票，有望打破上屆工聯會代表崔世昌以三百二十八票成為票王嘅紀錄。咁吳秋北勢將成為勞顧會嘅票王啦！

至於四個角逐連任嘅委員，包括勞聯副主席吳慧儀、工團秘書長李德明、公務員總工會主席鍾國星同公務員工會聯合會主席梁籌庭。由於四人已有經驗，連任機會亦較高。

至於其餘六個候選人當中，康樂事務職員總工會主席張兆榮上屆參選敗北，今次係捲土重來，另外五人則屬首次參選，包括執達主任助理協會財務主任程伯年、救生員總工會秘書施家羨、健體專業人員總會理事長王曉山、中大職員協會會長郭慧良同城巴僱員協會會長凌志偉。

篤張建宗做嘢

新一屆勞顧會勞方成員嘅任期由下年一月起，為期兩年，而勞工及福利局局長張建宗早前實牙實齒咁話會喺自己嘅任期內完成標準工時嘅研究，呢屆政府任期到二○一二年，而新一屆的勞方成員任期比張建宗嘅任期更長，睇嚟必定實同篤住張建宗做嘢，等佢冇得偷雞歎慢板同一味拖。