政情：霍震霆父子硬銷申亞

市民對香港申亞意見分歧，推手之一嘅港協暨奧委會會長霍震霆（Tim）好着緊件事，最近四出做說客，希望喺十二月前嘅諮詢期截止時，爭取到更多巿民支持，尋日更連同兩個仔一齊大講申亞好處。

Tim霍尋日出席活動，支持做志願者團長嘅大仔霍啟剛同總領隊葉振都，帶隊北上為廣州亞運會做義工。見佢左邊頭髮飛起一執，原來佢前日先去理完髮，仲話髮型師邊剪邊同佢呻喺香港好難搵到平靚正波地踢波，Tim霍即時順水推舟上猛銷埋申亞，話場館可以留畀巿民用，選手村又可以留番嚟畀巿民住，價錢唔貴兼且紓緩住屋需求，最終都係巿民得益。

出席同一活動嘅兩個仔啟剛同啟山都力撐老竇，啟剛話佢依家都做緊說客，呼籲體育界以個人名義發聲，大家團結發表意見，等大眾同政府聽到業界聲音，加上弟弟啟山有份幫手嘅廣州亞運喺諮詢期之前舉行，到時可以曲線宣傳亞運嘅好處。