政情：搞搞政：關愛基金變怪胎田少撐取消

施政報告提出關愛基金後，政界先湧出競選資本嘅質疑，近日又輪到商界同學者質疑，港大社會工作及社會行政學系教授周永新尋日都力數基金四大弊端，質疑基金會成「怪物」，同周永新一樣做過扶貧委員會嘅前自由黨主席田北俊，早前已經狠狠踩過基金，尋日更明撐取消基金嘅建議可以考慮。

關愛基金曾被形容為愛心工程，家吓卻大有可能變成被拮爆嘅氣球，難怪田少尋日出席一個電台節目時，都明言關愛基金嘅運作問題多多，值得考慮係咪取消。佢仲話，政府一向由勞工及福利局主管福利事務，今次竟然安排德成局長掌舵嘅民政事務局搞關愛基金，好易惹嚟政治敏感嘅質疑：「民政局要處理區議會事宜，會唔會到時建制派政黨申請撥款時就批，其他政黨就唔批㗎？」

周永新更認為，基金最大嘅弊端係欠缺一個完整嘅理念，批評港府冇諗過點樣將基金同現有嘅社會制度配合，令基金容易淪為有錢人對窮人嘅施捨，仲直言商界同港府混埋一齊：「事情不好辦」，建議各有各做，政府自己攞五十億出嚟扶貧算。