政情：陳瑞球被叫「死伯公」
政情：陳瑞球被叫「死伯公」
好多市民對自閉症嘅了解都唔多，尋日有間專為自閉症兒童而設嘅鄰舍輔導會陳蔭川學兒樂園開幕，設計同裝修所用嘅一百五十萬元原來由陳蔭川慈善捐款紀念基金捐出，紡織界老行尊長江製衣主席陳瑞球尋日都有出席個活動，原來佢同已故嘅陳蔭川係兄弟，而球伯同姪女陳淑蘭（陳蔭川女兒）亦係基金信託人。
球伯帶埋姪孫（陳蔭川嘅外孫）撐場，佢話姪孫以前都係自閉症兒童，照計應該嗌佢「四伯公」，但年紀細、口齒唔伶俐嘅姪孫卻經常叫咗佢做「死伯公」，球伯梗係冇怪姪孫，仲讚姪兒都有長處，睇地圖好叻。球伯仲透露，自己原名叫陳瑞鉸，但「鉸」字好多人唔識讀，後來改為「球」字，而佢胞弟陳蔭川都有另一個名叫陳瑞鴻。