政情：阿松嘆樓貴促遏炒風

樓價飆升，好多人都望樓興嘆，尋日國際小母牛香港分會喺維園舉行每年一度嘅競步善行，主席梁錦松、籌委會主席葉澍堃（Stephen）、「快勞夾（file）大王」杜振源（Simon）都有出席，佢哋仲不約而同表示，覺得樓價太貴，建議增加樓宇供應遏抑炒風。

阿松貴為前財爺兼黑石集團大中華區主席，問到股市同樓市係咪已出現泡沫時，阿松話股市暫時未見異樣，但樓價的確好貴，認為可從供求着手，增加供應自然炒唔起。Simon就話目前樓價好似拍賣紅酒咁貴得瘋狂，批評港府穩定樓價措施唔夠硬淨。Stephen就笑笑口話：「樓價梗係貴啦，有錢買就唔貴，好似我咁買唔起就貴囉！」

阿松尋日同太太伏明霞帶埋七歲半嘅大女Amy及近六歲嘅二仔Edward到場湊熱鬧，同場仲有奧運體操金牌得主李小鵬夫婦。阿松揸住一部Leica相機幫老婆仔女影相，原來佢學生年代已學攝影，仲話以前啲相機大大部，後來愈出愈細，依家又興番玩大機（單鏡反光機），所以佢都有部大機看門口，但尋日人多唔方便帶大機。今年「十人十一足」競步行籌得逾七百萬元，連同早前嘅籌款晚宴，共籌得逾一千萬元善款，用於幫助國內貧困農民自力更生。