政情：林公公無名火亂燒建制派

政府尋日公布二○一二年兩個選舉方案嘅本地立法建議，雖然係周末，政制及內地事務局局長林瑞麟同一眾議員都要開會兼開片，同泛民向來勢成水火嘅林公公尋日又被議員狂窒，但白鴿黨嘅高達揶揄佢「廢廢地」都未辣㷫林公公，反而商界嘅林大輝、富貴黨主席劉健儀（Miriam）甚至工聯會嘅王國興提質詢時，就即刻激到林公公火遮眼，狂批人哋自相矛盾、懶、甚至政治不正確，林公公忽然對建制友咁刻薄，唔通佢以為本地立法建議唔使向建制派拉票？

還拖斥混淆視聽

政府設計嘅超級區議會選舉開支可達六百萬元，廠商會嘅林大輝質疑呢個設計只顧大政黨，冇關愛獨立參政人士，佢話口未完，林公公即刻扯火還拖，語帶尖酸咁話，從政兩年多嘅林議員一向言論率直，唔知點解佢會混淆視聽、自相矛盾，又強調關愛基金係扶貧計劃， 唔可以同參選撈埋講。林大輝即刻向主席表示要澄清言論，點知林公公反問主席：「佢唔畀我講嘢嘅？商會代表好少唔畀官員發言喎！」

怒轟政治不正確

火起三千丈後，到Miriam質問政府冇改善功能界別議員嘅選舉建議，係咪為政太懶時，林公公嘅怒火又再度上升，仲「以懶還懶」，話政府喺擴大功能界別選舉方面做咗好多嘢，但遲遲唔見Miriam向佢哋提交意見文件，反譏Miriam更加懶。

建制派一向係政府嘅半盟友，但林公公尋日就一再狙擊建制派，工聯會嘅王國興尋日以「唔好似直布羅陀嘅馬騮」嚟諷刺佢有頭冇尾時，林公公即刻上綱上線話佢政治不正確，因為工聯會嘅佢猛講英國殖民地。聽完佢哋嘅說話，相信好多市民都會同意本港議會辯論「精華太少、廢噏太多」呢句評語。