Sun世代：80後美女富豪再唔執著

有「80後美女富豪」稱譽的富豪酒店太子女羅寶文，擁有超完美人生，她是香港傑出學生和香港傑出青年，十五歲跳級入大學，十九歲以一級榮譽畢業。她篤信佛教，自知幸運，一直積極行善，並將佛學融入營商理念。所以，她能豁達的說：「唔係賺到盡先係好，內心財富更重要！」

三十歲的羅寶文（Poman）是名門第三代，祖父是鷹君集團創辦人羅鷹石，父親羅旭瑞是富豪集團主席。她是孻女，有一個哥哥。十年前接掌家族生意，現任富豪酒店、百利保及世紀城市國際控股有限公司執行董事。

15歲入大學 19歲畢業

Poman自小已是資優生，入讀名校瑪利曼，年年考第一：「細個好勝，父母從來冇逼我，係自己唔輸得。」十四歲當選香港傑出學生，十五歲獲獎學金「升呢」入讀美國杜克大學心理學系，十九歲以一級榮譽成績畢業，二十七歲榮膺香港十大傑出青年。

命途一帆風順，她自覺「好叻」，涉足商場後方知不足：「最初做市場推廣，推出九十九小時情人節酒店住宿，有花有餐飲有朱古力，諗住一定掂啦，點知反應好一般。」失敗經驗令她自省：「明白到做生意要考慮得好仔細，自己一啲都唔叻。」

創新宣傳 贏漂亮一役

○三年推出赤柱富豪海灣豪宅項目，終贏了漂亮一仗，憑創新的宣傳手法令樓盤大賣：「始終唔係新鴻基呢類大集團有咁多錢宣傳，我同電視台合作，搵陳慧琳、郭富城、李克勤喺富豪海灣拍音樂劇，出嚟嘅反應好好！」

受信佛的母親影響，Poman篤信佛教，○四年皈依，兩年前茹素。

「我自細就有好多問題，成日諗點解有人有錢，有人捱窮？佛教畀到答案我，呢啲都係以前種落嘅因。學佛亦令我眼界闊咗，不再執着。」

身在福中，她也積極行善回饋社會，例如加入「百仁基金」、任樂施會大使、動物醫生愛心大使等。灣仔富豪薈酒店，更是全港第一間碳中和環保酒店。「做生意唔係賺到盡先係好，應該創造多贏，發展長遠關係。淨係掛住賺多幾個零，忽略身邊嘅人，又有乜意思？人嘅財富會受個市影響，只有內心財富先係最重要！」

Poman's Profile

羅寶文

年齡：30歲

學歷：美國杜克大學心理學系學士

現職：世紀城市國際控股有限公司執行董事

　　　百利保控股有限公司執行董事

　　　富豪酒店國際控股有限公司執行董事

興趣：繪畫、設計