政情：田少忍口淺嘗極品火腿

香港旅遊發展局再次喺西九海濱長廊辦「香港美酒佳餚巡禮」，尋晚正式開幕，在場仲遇到金陶軒老闆、港區全國政協委員KK王國強去巡視店舖攤位，為伙記打氣。

金陶軒近年喺旅發局主辦嘅「美食之最大賞」屢獲大獎，今年再下一城嚟個「雙響炮」，啱啱憑「脆皮椰子雞」同「紫袍羅漢會龍皇」兩道名菜，分別奪得今年「美食之最大賞」賽「雞組」同「海鮮組」嘅至尊榮譽大獎。

除咗巡攤位外，KK仲即場品嘗由佢哋至尊金獎大廚炮製嘅「秘汁魚蛋」。呢道美食以東南亞「是拉差」辣椒汁、椰汁同魚露熬製而成，佢食得津津有味，仲大讚好味道添。

旅發局主席田北俊喺中午就率先帶傳媒參觀攤位，行到火腿極品西班牙黑毛豬腿攤位時，各人無不垂涎，但田少定力十足，只係食咗兩三片，仲回憶話以前曾經喺西班牙買過一隻黑毛豬腿，空運返香港試，諗住請客一流，點知腿身好難「片」，屋企工人「片」到手軟。對有指黑毛豬嘅脂肪係健康嘅不飽和脂肪，有助降低人體膽固醇，田少半信半疑，難怪佢冇畀黑毛豬腿嘅魅力攝住啦！

曾經因心臟病發入院搶救嘅財爺鬍鬚曾亦懶理健康，竟然狂試芝士、小籠包、火雞同燒火腿等高脂美食。