政情：金勞詹陳健波唔吼AIA

友邦保險（AIA）今日上市，全城矚目，備受股民熱捧。不過，本身從事證券生意嘅立法會金融服務界議員「金勞詹」詹培忠，同保險界代表陳健波，尋日不約而同話冇認購。點解佢哋唔吼AIA呢隻「集資王」新股呢？

金勞詹申報利益，話自己係公司機構投資者，唔愁不獲配股，優惠折扣未必有，但如果佢想要貨，就肯定有得揸手。不過，佢自覺係公眾人物，利益申報一定要好謹慎，佢懶得花工夫搞申報，索性唔攞AIA配股，食少多覺瞓！哦！唔認購AIA，原來只係純粹為慳工夫啫！

至於陳健波，佢喺九月份起放棄慕尼黑再保險公司香港分公司行政總裁一職，轉任顧問，即係同AIA分屬同行，佢唔抽AIA新股，唔通真係同行如敵國？非也，佢解釋最近議會事務太忙，加上自己鍾情中資股，所以咪冇入飛抽AIA新股囉。佢又話依家股市個浪已經升到好高，可能有回潮迹象，謀定而後動，遲啲再入飛都未遲。