政情：葉劉組黨意在特首

據聞，匯賢智庫主席葉劉淑儀計劃喺十二月成立嘅新政黨暫名「新民黨」，專攻中產專業路線，最近佢全力狙擊《競爭法》，就係要為創黨壯聲勢。佢尋日喺電子傳媒上解釋，組黨係為日後參選區議會同立法會更加名正言順，旗幟分明。然而，親中陣營多認定佢組黨嘅背後仲有更遠大嘅目標。

封咗蝕本門嘅必賺生意

親中陣營人士分析，葉劉要開拓區會同立會版圖，匯賢智庫班底已夠用，呢個時候籌組新政黨，實為壯大實力同聲勢，可以喺二○一二年特首選舉中同其他對手爭一日之長短。佢同其他現時流傳嘅疑似特首候選人唔同嘅地方，係佢基本上獨立於西環同特區政府，不受羈絆，所以佢選特首嘅機率反而比其他人更高。

當然，葉劉組黨唔代表就有能力摘取特首冠冕，消息分析指出，如果葉劉參選，造成嘅客觀事實，就係攪亂整個中央布局，為整個選戰增添好多不可預測嘅變數，尤其民主派好大機會派人落場競逐，中央一向對特首選舉安全系數要求極高，唔願見到任何潛在風險，喺咁嘅情況，中央惟有出手勸退葉劉，按香港政壇嘅運作慣例，葉劉例必可獲「補償」。算盤打落，佢組黨係咪一套封咗蝕本門嘅必賺生意呢！