政情：余國春浸大白飯魚結緣

裕華國貨捐出五百萬元畀浸大開展當代中國研究同擴充校園，而浸大就將一個演講廳以「裕華國貨」命名。全國政協常委、裕華國貨董事長總經理余國春率領弟弟余鵬春、妹妹余小春同堂兄余在春，一齊出席尋日舉行嘅命名典禮，同一眾嘉賓回味昔日體育堂必備嘅「白飯魚」。

學生去「裕華國貨」上堂

演講廳「開張」，全國政協委員盧文端同王國強、潮屬社團總會主席許學之、前港區全國人大代表陳有慶同阿仔陳智文等都有撐場。余國春慷慨支持浸大，原來浸大校長陳新滋同浸大基金主席王英偉都撐裕華國貨，學生哥年代上體育堂同落場踢波必備國產「白飯魚」波鞋，黑咗就用白鞋油髹番靚，着到爛就去裕華買過第二對，真係唔講得笑。

今次浸大將演講廳命名為「裕華國貨」，好多學生都講笑咁話以後要去「裕華國貨」上堂，索性話去「裕華」就得嘞。余國春就話「裕華」兩字意思係富裕中華咁解，但富裕中華背後要由國貨帶動，所以堅持要用晒「裕華國貨」四個字喎！