政情：劉健儀甘威抽水失敗

環境局局長邱騰華喺擴建將軍澳堆填區一役，夾硬要徵用郊野公園用地，仲搞出憲制風波，嚴重破壞行政、立法關係，立法會六大黨派早前更罕有聯手同政府反枱，通過廢令。政府要「霸王硬上弓」嘅，豈止將軍澳堆填區？

中上環交通實塞到暈

立法會正審議《2010港口管制（公眾貨物裝卸區）令》，呢條法令同擴建將軍澳堆填區一樣係先訂立後審議，訂明喺十一月十三號實施。呢條法令主要係徵用西區公眾貨物裝卸區部分土地做卸泥口處理八十噸泥頭，畀港鐵港島西支線工程之用。

據聞小組委員會喺本月十九號嘅會議中，做主席嘅劉健儀（Miriam）同委員甘乃威，狂轟運輸及房屋局副局長邱誠武，點解呢條法令淨係有實施日期，但冇還原日期，亦冇講還原後點處理？尤其係依家中上環嘅交通已經好擠塞，仲要處理咁大量沙泥運送，到時肯定塞到暈。

睇嚟Miriam同甘威想炒起呢單嘢噃，佢哋仲兜口兜面同邱武講，若果政府唔交代還原日期同還原後點處理，佢哋會索性提出修訂，幫政府加番個還原日期落去。若果真係提修訂嘅話，呢條法令肯定冇可能如期喺十一月十三號實施，咁咪變咗將軍澳堆填區翻版囉。

各懷鬼胎藉機谷民望

見到先前邱騰華搞到一鑊泡，再企硬落去，邱武肯定又係撼頭埋牆。據聞，邱武就喺前日嘅會議上，話政府會主動修訂加番個還原日期，就係喺二○一四年十二月三十號。港鐵港島西支線工程喺二○一四年首季竣工，而邱武訂嘅日期仲遲多三季，擺明幫自己買保險。

甘威因為炒女助理事件，搞到由雷曼鬥士變咗「隱士」，眼見同為中西區區議員兼立會同僚嘅陳淑莊，喺將軍澳堆填區一役撈到政治油水，佢自不然更心急想炒起啲議題谷民望。至於Miriam亦希望富貴黨做多啲地區工作，日後逐步走向直選之路，尤其佢亦喺將軍澳堆填區廢令事件表現甚勇，當然想借呢次卸泥口再下一城，但喺邱武主動拆彈後，當然炒唔起啦！